القضية منهو بيها ؟ - حوار

- خيرك متكنطي يا راجل ؟
- اماليا شادين فيا يبوني نتزوج
- باهي وانت شن رايك ؟
- مش وقتها
- وامتة وقتها ؟
- مش توة
- امتة يعني ؟
- لما نحدد موقفي
- موقفك من شنو ؟
- من الحياة !
- باهي انت شن تبي بالزبط من الحياة ؟
- الوضع مش عاجبني , كل شي لازم يتغير
- وانت اللي بتغيره ؟
- ........
- باهي وشن دخل الزواج في التغيير اللي تبيه يصير ؟
- الزواج والمسئوليات والصغار بياخدو كل وقتي , واني مش فاضي
- علاش انت شن ادير بعد الخدمة ؟
- شي
- يعني فاضي باش تفتح حوش
- انت مش فاهم
- فهمني
- مانبيش نولي زيهم
- زي شكون ؟
- زيهم كلهم
- كيف زيهم ؟
- زيهم يعني راجل صاحب عيلة عنده طزينة صغار وكرشته قدامه وبدلة عربية وشبشب صبع ومروح القايلة شاد دلاعة في ايده بيفرح بيها الصغار ..
- عمي الحاج قصدك ؟
- ايه
- يا صاحبي كل اللي كان عندهم قضايا تزوجو و ربو صغارهم ومانسوش قضيتهم
- لازم الواحد يضحي
- معاك , لكن يضحي يولي عنده عيلة مقابل شنو ؟
- ........
- نعم ؟ ماسمعتكش ؟
- .......